سەرۆکی ئەمریکا : شەڕی غەززە کۆتایی هاتووە

سەرۆکی ئەمریکا ئاشکرایدەکات، هەر یەک لە حەماس و ئیسرائیل ڕێککەوتنی ئاشتیان واژۆکردوە قوناغی یەکەمی دەچێتە بواری جێبەجێکردنەوە. 

دۆناڵد ترەمپ، پێنجشەممە ٩ی تشرینی یەکەمی ٢٠٢٥، لە پۆستێکیدا لە پلاتفۆڕمی ''ترو سۆشیال'' دەڵێت'' ئەمڕۆ ڕۆژێکی گەورە و مێژوویە بۆ جیهانی عەرەبی و ئیسلامی هەروەها بۆ ئیسرائیلیش ڕێککەوتنی ئاشتی لە کۆتایدا واژۆکرا.'' 

سەرۆکی ئەمریکا، لە درێژەی قسەکانی سوپاسی هەر یەک لە میسرو قەتەر کردوە بۆ ڕۆڵگێڕانیان وەک نێوەندگیر بە مەبەستی بەستنی ئەو ئاگربەستە. 

ترەمپ وتیشی'' شەڕی غەزە کۆتایی هاتوە، چارەسەری کۆتایی بۆ جەنگە کراوە لە ئێستاوە بارمتەکان ئازاد دەکرێن و هێزەکانی ئیسرائیل لە غەزە دەکشێنەوە، ئەمە سەرەتایە لە پاشان سەرجەم قۆناغەکانی ئاشتی جێبەجێدەکرێن.'' 

لەلای خۆشیەوە، بنیامین نەته‌نیاهۆ، سەرۆک وەزیرانی ئیسرائیل دەڵێت'' ئەمڕۆ ڕۆژێکی گەورەیە بۆ ئیسرائیل، کابینەی حکومەت ڕێککەوتنەکە پەسەند دەکات بە مەبەستی گەڕاندنەوەی هەمو بارمتە خۆشەویستەکانمان بۆ ماڵەوە".

بزووتنەوەی حــەماسیش ڕایگەیاندووە "ڕێككەوتنەکە بۆ كۆتاییهێنانە بە جەنگی غــەززە، كشانەوەی داگیركاری، هاتنە ناوەوەی هاوكاری و ئاڵوگۆڕی زیندانیکراو و بارمتەكان".

بەپێی زانیارییەکان، بارمتە زیندووەكانی ئیسرائیل لە بەرامبەر ئازادكردنی نزیكەی دوو هەزار زیندانكراوی فەلەستینی ئازاد دەكرێن.'' 

ئەمە لە کاتێکدایە، بەهۆی شەڕەوە لە غەزە نزیکەی ٧٠ هەزار کەس بە پێی ئامارە نافەڕمییەکان کوژراون و زیاتر لە ١٧٠هەزار برینداریش تۆمارکراوەن.