سەنتەری میترۆ : میدیاکان بە پیشەییانە و بەرپرسیارێتییەوە ڕوماڵی ڕوداوەکان بکەن

میدیاكان بە پیشەییانەو بەرپرسیارێتییەوە روماڵی روداوەكان بكەن

27ی تشرینی دووەمی 2025، سلێمانی، سەنتەری‌ میترۆ داوا لە میدیاكانی‌ هەرێمی‌ كوردستان دەكات بۆ ڕووداوە نەخوازراوەكانی‌ هەرێمی‌ كوردستان پیشەییانە و بە بەرپرسیارێتییەوە مامەڵە بكەن و دوور بكەونەوە لەڕای‌ پێشوەختە نەبنە هۆكاری‌ نانەوەی‌ پشێوی‌ و گەرمكردنی‌ دووبەرەكی‌ لە نێو لایەنە سیاسییەكانی‌ هەرێمی‌ كوردستان، ململانێ و ئەجێندای حزبی و تایبەتی تێكەڵ بە بابەتە هەستیارەكان نەكرێت.

دوێنێ‌ شەو، رێكەوتی 26 ی تشرینی دووەمی 2025، لە دوای هێرشی تیرۆرستی بۆسەر كیڵگەی گازی كۆرمۆر،  چەند میدیا و پەیجێك لە تۆرە كۆمەڵایەتییەكان لەهەرێمی‌ كوردستان سەرەرای‌ تازەیی‌ ڕووداوی‌ بۆردوومانی‌ كۆرمۆر و پێكهێنانی‌ لیژنەی‌ لێكۆڵینەوە و ئیدانەكردنی‌ وڵاتانی‌ زلهێزی‌ دنیا بەبێ‌ ئەوەی‌ كەس تۆمەتبار بكەن بەو هەموو ئیمكانیەتە ئەمنییە گەورەیەیانەوە كەچی‌ هەندێك میدیا و پەیجی فەیسبوكی نزیک لەدەسەڵات بەئەنقەست و دوور لە جێبەجێكردنی‌ پرەنسیپەكانی‌ ڕۆژنامەوانی‌ تۆمەت دەبەخشنەوە و ململانێ‌ سیاسییەكان توند دەكەنەوە. بەبێ ئەوەی بزانن ئەمەش تێکدانی ئەمنی قەومییە.

وەك سەنتەری‌ میترۆ، داوا لە میدیاكان دەكەین، بە بەرپرسیارێتییەوە مامەڵە لەگەڵ رووداوەكان بكرێت و نەبنە بەشێك لە شەری میدیایی و ئەجێندای تایبەتییەوە. ئەم گوتارە میدیاییە كە ئێستا لەهەندێك میدیا و تۆڕە كۆمەڵایەتییەكانی نزیک لە دەسەڵات  بەرێوە دەچێت، بێجگە لە ڕای‌ پێشوەختە و پشێوی‌ نانەوە چی‌ تر بۆ گەلی‌ كوردستان ئەچنێتەوە؟

ئەوەی‌ كەبەشێك لە میدیاكان دەیكەن، گوتارێكی‌ ناڕێكی‌ میدیاییە كە بۆتە چەكێك بەدەستی‌ خەڵكانێكەوە كە بەرژەوەندییان لەپشێویی‌ و شەڕو ئاشوبدایە، بۆیە دەبێت میدیاكاران زۆر بەوریایی و بەرپرسیارێتییەوە مامەڵەبكەن.