شێروانە بوو بە پاڵەوانی خولی نایابی کوردستان

شێروانە بە سوود وەرگرتن لە دۆڕانەکەی پێشمەرگەی هەولێر بەرامبەر پیشەسازی بۆیەکەمجار لە مێژوویدا بووە پاڵەوانی خولی نایابی کوردستان.

یانەی شێروانە سێ گەڕ زووتر نازناوی ئەم وەرزەی خولی نایابی کوردستان یەکلاکردەوە، دوای ئەوەی پێشمەرگەی هەولێر لە گەڕی بیست و حەفتەم لە یاریگای خۆی 2-1 بە پیشەسازی دۆڕا، شێروانە پلەی یەکەمی مسۆگەرکرد و بۆیەکەمجار لە مێژوودا نازناوی خولەکە بەدەست دەهێنێت.

شێروانە بە کۆکردنەوەی 53 خاڵ پێشەنگی خولەکەی گرتووە و زاخۆ و پێشمەرگەی هەولێر بە 43 خاڵ پلەکانی دووەم و سێیەمیان گرتووە.

شێروانە ساڵی 1992 دامەزراوە، یەکەمجارە نازناوی خولی نایابی کوردستان بەدەست دەهێنێت، کە ساڵی 2005 خولی نایابی کوردستان دامەزراوە و یەکەمجارە یانەیەکی دەڤەری گەرمیان نازناوەکە دەباتەوە، یانە گەرمیانیەکە لە ساڵی 2021یش بووە پاڵەوانی جامی سوپەری کوردستان.