سزای قورس بۆ ١٦ مامۆستا لە ڕۆژهەڵات دەرکرا

سزای قورس بۆ ١٦ مامۆستا لە ڕۆژهەڵات دەرکرا

نێرگس محەممەدی سزای قورسی ١٦ مامۆستای لە پارێزگای کوردستان بە نیشانەی تووندکردنەوە و چڕبوونەوەی سەرکوتکردنی سەندیکاکان زانی.

نێرگس محەممەدی براوەی خەڵاتی نۆبڵی ئاشتی، لە نامەیەکدا بۆ (مای ساتۆ)، پەیامنێری تایبەتی مافی مرۆڤی نەتەوە یەکگرتووەکان، ڕەخنەی لە سەرکوتکردنی چالاکییەکانی سەندیکای مامۆستایان لە حکومەتەکانی دوای شۆڕشی ساڵی 1979 گرت و هۆشداریشیدا لەوەی، کە ئێستا سەرکوتکردنەکان بەردەوام بوون و  بە دەرکردن و خانەنشینکردنی زۆرەملێ و دوورخستنەوەی لانیکەم (16) مامۆستا لە کوردستان بەردەوامە.

لەم نامەیەدا، کە لە هەژماری تایبەتی خۆی لە تۆڕی کۆمەڵایەتی ئینستاگرام لە ڕۆژی هەینی ٤ی ئاب بڵاوکراوەتەوە، محەممەدی جەختی لە هاودەنگی دامودەزگاکانی مافی مرۆڤ کردەوە و داوای لە یونسکۆ و ڕێکخراوی کاری نێودەوڵەتی کرد ڕێگری لە بەرپرسانی وەزارەتی پەروەردە و وەزارەتی هاوکاری و کار و چاودێری کۆمەڵایەتی بکەن لە کۆبوونەوە نێودەوڵەتییەکان و فشار بکەن بۆ هەڵوەشاندنەوەی "حوکمی ستەمکارانە" دژی مامۆستایان، بەتایبەتی لە پارێزگای کوردستان.

بە پێی نووسینەکەی نێرگس محەممەدی، سەرکوتکردنی چالاکییەکانی سەندیکای مامۆستایان لە دوای دامەزراندنی کۆماری ئیسلامیەوە لە هیچ قۆناغێکی سیاسیدا نەوەستاوە و لە سەردەمی حکومەتە جیاوازەکاندا بەردەوام بووە. ئەم ڕەوتە لە سەردەمی کابینەی حکومەتی )ئیبراهیم ڕەئیسی)دا گەیشتە لوتکە و لە دوای بزووتنەوەی "ژن، ژیان، ئازادی"ییەوت توندتر و چڕتر بووەوە.
ناوبراو سەرەتای سەردەمێکی نوێی ویست و داخوازییەکانی سەندیکا و یەکێتییەکانی لە دوای سەرکوتکردنە خوێناوییەکانی شەستەکان و کۆتاییەکانی حەفتاکانی سەدەی ڕابردووی زانی و ئەوەشی بە بیری هێنایەوە، کە یەکەمین شەپۆلی بەربڵاوی سەرکوتکردن لە هەمان ئەو ساڵانە و لە سەردەمی حکومەتی چاکسازیدا ڕوویدا.

ڕەزا ئەکوانیان، ڕۆژنامەنووس و چالاکوانی مافی مرۆڤ لە چاوپێکەوتنێکدا لەگەڵ ئێران ئینتەرناشناڵ سەبارەت بەم هەڵوێستە وتی: نامەکەی نێرگس محەممەدی پەیامی ڕوونی هەیە؛ یەکەم، درێژەدان بە شێوازێکی دووبارەبووەوەی سەرکوتکردنی چالاکییەکانی سەندیکای مامۆستایان لە حەفتاکانی سەدەی ڕابردووەوە و چڕبوونەوەی لە دوای بزووتنەوەی "ژن، ژیان، ئازادی" کە ئێستا بە حوکمی کارگێڕی دژی ١٦ مامۆستا لە کوردستان خۆی دەردەخات. دووەم: کاریگەریی ڕاستەوخۆی ئەم ڕەوتە لەسەر کوالیتی خوێندن و داهاتووی خوێندکاران و پێویستی کۆتاییهێنان بە ئەمنیکردنی داواکارییەکانی سەندیکاکان”.


سزای قورس بۆ ١٦ مامۆستا لە کوردستان دەرکرا

محەممەدی لە درێژەی نامەکەیدا بۆ پەیامنێری تایبەتی مافی مرۆڤی نەتەوەیەکگرتووەکان لە ئێران و نووسیویەتی: سەدان چالاکوانی سەندیکای مامۆستایان و ڕۆشنبیران دەستبەسەر کراون و "زیاتر لە 300 مامۆستا، چالاکوانی سەندیکا و خوێندکاران ڕووبەڕووی سزای ئیداری بوونەتەوە، لەوانە دەرکردن و دابڕاندن.

ئەم چالاکوانەی مافی مرۆڤ، بە دەرکردنی حوکمی قورسی دەرکردن و دابڕاندن و  خانەنشینکردنی زۆرەملێ بۆ ١٦ مامۆستا لە شارە جیاوازەکانێ پارێزگای کوردستان وەک نموونەیەکی دیار و بەردەوامی گوشارەکانی سەر مامۆستایانی سەردەمی حکومەتی مەسعود پزشکیان هێنایەوە و بە "سیمبوڵی توندوتیژی زیاتری لە دژی گەلی ئێران، بە تایبەت خەڵکی پەراوێزخراو بە کوردستانیشەوە" ناو برد.

پەرویز ئەحسەنی، سومەیە ئەختەرشمار، لوقمان ئەڵامورادی، جەهانگیر بەهمەنی، سەلاح حاجی میرزایی، لەیلا زارعی، لەیلا سەلیمی، ئومێد شاه محەممەدی، سولەیمان عەبدی، هیوا قوڕەیشی، شەهرام کەریمی، مەجید کەریمی، نەسرین کەریمی، کاوە محەممەدزادە، غیاس نیعمەتی و فەیسەڵ نوری ئەو (١٦) مامۆستایەن، کە ڕووبەڕووی دەرکردن و دابڕاندن و ڕاگرتن و خانەنشینی زۆرەملێ و دوورخستنەوە بوونەتەوە.
محەممەدی ئەوەشێ زیاد کرد: دەرکردنی ئەو حوکمانە لە سەروبەندی ساڵڕۆژی بزووتنەوەی ژینا مەهسا ئەمینی نیشاندەری ئەوەیە کە کۆماری ئیسلامی بە قووڵی نیگەرانە لە سەرهەڵدانی نوێبوونەوەی  داواکارییەکانی گەلانی ئێران بۆ بەدیهێنانی دیموکراتی و خواستی دادپەروەری.