زۆریش ڕاستگۆن

زۆریش ڕاستگۆن

بانگەشەی هەڵبژاردن کۆتایی هات، سەرۆک و سەرکردەی حزبەکان بە ئۆپۆزسیۆن و دەسەڵاتەوە دواقسەی خۆیان کرد.
ئێوە لە قسەی ئۆپۆزسیۆن گەڕێن، گوێ لە میدیاکانن مەگرن و ڕەخنەی خەڵکی بێلایەنیش تووڕ بدەن.
تەنها سەیری میدیای یەکێتی و پارتی بکەن، گوێ لە قسەکانی سەرۆکەکانیان تا ئەندامێکی ئاساییان بگرن، ئەوان لە هەموان ڕاستگۆترن.
کاتێک یەکتر بە گەندەڵ، خیانەتکار، تیرۆریست، بەکرێگیراوی وڵاتان، خاکفرۆش، خاوەن میلیشیا، سەرکوتکار و دژە ئازادی، دەستوەردان لەدادگا و هەموو سێکتەرکانی تر، تسفیەی نەیار و تیرۆرکردنی رۆژنامەنووس، چالاکی مەدەنی و سیاسی، زیندانیکردن و دروستکردنی دۆسیەی سیاسی، بردنی داهات و قاچاخچێتی شوێنەوار و مادەی هۆشبەر و نەوت و ئاسن و دارو بەرد لە مەرزەکان بە پاڵپشتی میلیشیاکانیان تۆمەتبار دەکەن.
 لەگەڵ هەزاران ڕاستی تر کە لەسەر یەکیان ئاشکرا کردووە، ڕاستی حوکمڕانی یەکێتی و پارتین.
تەواوی تۆمەتەکان و دەقی وشەکانیش، هیچیان هی من نین، قسەو لێدوانی سەرکردەکانی یەکێتی و پارتین و هەموویان بە ڤیدیۆ لە میدیاکانی خۆیانەوە لەسەر یەکتر وتووە.
باشە تۆی دەنگدەر ئەگەر دژی ئەو کردەوانەی، بە چ ویژدانێک دەنگیان پێ ئەدەیت و ڕەوایەتییان پێ ئەدەی لەسەر ئەو هەموو کارە قێزەونانە بەردەوام بن و بە پاڵپشتی دەنگی تۆ خراپتر بکەن و بێ منەتتریش بن؟
هەر حوکمڕانییەک لە هەر گۆشەیەکی ئەم گەردوونە باش بێ یا خراپ، ڕەنگدانەوەی هۆشیاری خەڵکەکەی و ئاستی باشی و خراپییانە.

گەرمیان حەمەی پوور