دەقی نامەکەی عەبدوڵا ئۆجەن بۆ عەشیرەت و شێخ و پیاوماقوڵانی سوریا

نامەی عەبدوڵڵا ئۆجەلان بۆ شێخ و پیاوماقوڵانی عەشیرەتەکانی ناوچەکانی جەزیرە، دێرەزوور، ڕەققە و تەبقە لە سوریا

دەقی نامەکە:

بەڕێزان:
سەرەتا، بە خۆشحاڵی و خۆشەویستی و ڕێزەوە سڵاوتان لێ دەکەم.

یەکگرتن و پشتیوانی ئێوە بۆ کورد لەسەر بنەمای سیستەمی نەتەوەیی دیموکراتیی، واتایەکی گەورەی هەیە.

ئێوە لە ڕێگەی ئەم ڕێککەوتنەوە، بناغەیەکی مێژوویی نوێ بە متمانە و پەیوەندی و هاوپەیمانێتی نێوان گەلانی عەرەب و کورد دروستدەکەن.

لە دڵی مێژوو و ڕابردوودا، پەیوەندییەکانی نێوان گەلانی کورد و عەرەب هەیە. لە قووڵایی مێژووشدا هەمیشە دۆستایەتی و برایەتی نێوان گەلانی عەرەب و کورد لە پێشەوە بووە. تەنانەت ئەم دۆستایەتییە بووەهۆی ئەوەی زۆرینەی کورد بە ئاسانی بچنە ناو ئیسلامی حەنیفەوە لە ماوەی دەرکەوتن و بڵاوبوونەوەیدا بە سەرۆکایەتی پێغەمبەر محەمەد [د.خ]، هۆکاری سەرەکی ئەمەش بۆ پەیوەندی بەهێزی نێوان گەلانی کورد و عەرەب دەگەڕێتەوە، ئەم پەیوەندیی برایەتییە لە نێوان گەلاندا دوای ئیسلامیش بۆ چەندین سەدە بەردەوام بوو و گەشەی کرد.

واتە ئەم ڕێککەوتنەی ئێوە ئەمڕۆ پێشەنگایەتی دەکەن، لە لایەکەوە مێژووییە، لە لایەکی ترەوە کۆمەڵایەتییە، هەروەها بنەمایەکی سیاسییشی هەیە، بۆیە ئەم هەڵوێست و یەکگرتنە لە سووریا گرنگییەکی گەورەی هەیە، من واتایەکی گەورەی پێ دەدەم، وەک پشتیوانێک بۆ برایەتی و هاوپەیمانێتی گەلانی کورد و عەرەب دەوەستم لەبەر ئەوەی بنەمایەکی مێژوویی هەیە.

لەسەر ئەم بنەمایە، ئێمە پەرەمان پێداوە و ڕێنماییمان داوە لەسەر بنەمای برایەتی گەلان و نەتەوەیی دیموکراتیی. پێویستە هەمووان یەکسان و ئازاد بن و پێکەوە بژین و پێکەوە خۆیان بەڕێوەببەن، یەکسانی و ئاسایش و دادپەروەریی پێویستە لەسەر ئەم بنەمایە دروستبکرێت. هەروەها عەرەب و کورد پێکەوە بە ئاشتی بژین و ئەمەش پەیوەستە بە پشتیوانی ئێوە بۆ هێزەکانی سووریای دیموکرات، لەم بارەیەوە پشتیوانی ئێوە بۆ هێزەکانی سووریای دیموکراتی گرنگییەکی زۆر و واتایەکی گەورەی هەیە.

بەڕێزان..

دەتوانن ڕۆڵێکی گرنگ و مێژوویی بگێڕن لە بنیاتنانی سووریایەکی دیموکراتی، ئارام، یەکگرتوو و دادپەروەر. گرنگە بۆ عەرەب، کورد، سریانی و ئاشووری و هەموو ئەوانەی لەسەر ئەم خاکە پیرۆزە دەژین، بۆ ئەم برایەتییە مێژووییە بجووڵێن. من بەم ئومێد و متمانەیە بە توندی لە باوەشتان دەگرم.

دووبارە بە ڕێزێکی زۆرەوە سڵاوتان لێ دەکەم
بە هیوای تەندروستی و سەرکەوتن بۆتان لە ژیاندا
بە سڵاوی دۆستایەتی و برایەتی.

عەبدوڵڵا ئۆجەلان
زیندانی ئیمرالی

- وەرگێڕان : یادگار عەلی